Նոր բժշկական կենտրոն

Այն հագեցած է ժամանակակից բժշկության վերջին ձեռքբերումներով Ժամանակակից բժշկության վերջին ձեռքբերումները եւ հնարավորություններն են ներդրվել մայրաքաղաքի «Ռաֆայել» բժշկական կենտրոնում, որի բացումը տեղի ունեցավ երեկ։

Կենտրոնը կոչված է իրականացնելու հիվանդանոցային՝ ընդհանուր վիրաբուժական, գինեկոլոգիական, ուռոլոգիական, ակնաբուժական, վնասվածքաբանական, օրթոպեդիական, վերակենդանացման բուժօգնություն եւ բուժսպասարկում։ Այն հագեցած է նորագույն սարքավորումներով։ Կենտրոնի կառուցման եւ բուժսարքավորումներով համալրելու համար ներդրվել է 2,7 մլն դոլար։

Կենտրոնի բացմանը ներկա էր վարչապետ Տիգրան Սարգսյանը։ Վարչապետը կարեւորեց Հայաստանում ժամանակակից բժշկական կենտրոնների հիմնումը, որոնք կարող են որակյալ ծառայություններ առաջարկել մեր քաղաքացիներին. «Փաստորեն՝ մեզ համար այսօր կրկնակի տոն է. հայոց բանակի կազմավորման տարեդարձի օրն է տեղի ունենում բժշկական կենտրոնի բացման հանդիսավոր արարողությունը»։ Այնուհետեւ Տիգրան Սարգսյանը շրջեց բժշկական կենտրոնում, ծանոթացավ շենքային պայմաններին ու տեխնիկական հնարավորություններին։

Կենտրոնի գիտական ղեկավար Արմեն Մելիքյանի խոսքով՝ պետք է ձգտել, որ առողջապահական բոլոր կենտրոնները լինեն որակյալ ու ժողովրդի համար մատչելի. «Կենտրոնի ստեղծմամբ մենք սահմանել ենք մի չափանիշ, եւ ցանկանում ենք, որ այսուհետեւ Հայաստանում կառուցվող բժշկական կենտրոնները միշտ գերազանցեն այն»։ Առողջապահության նախարար Հարություն Քուշկյանը համոզմունք հայտնեց, որ կենտրոնն իր դերը կունենա ոլորտի զարգացման գործում։ Կենտրոնին առողջապահության նախարարության կողմից հատկացվելու է պետպատվերի համակարգ, որը հնարավորություն կտա նաեւ անապահով խավին՝ օգտվելու այս բարձակարգ կառույցի ծառայություններից։ Հ. Քուշկյանը հավաստիացրեց, որ բժշկական կենտրոնում գնային քաղաքականությունը լինելու է մատչելի։

Հարցեր, պատասխաններ, մեկնաբանություններ